ब्रेकिंग

विदेश

कुकी बंडखोरांसाठी बांगलादेश बनले आश्रयस्थान

Samruddhi Dhayagude
30 May 2025

३० हजार गणवेश जप्त; छुप्या युद्धासाठी प्रशिक्षण

ढाका : बांगलादेशच्या चटगावमध्ये सक्रिय असलेल्या ’कुकी चिन नॅशनल फ्रंट’ या बंडखोर गटाविरुद्ध सुरक्षा दलांनी मोठी कारवाई सुरू केली आहे. या कारवाईदरम्यान, बंडखोरांसाठी तयार केले जाणारे जवळपास ३० हजार गणवेश जप्त करण्यात आले आहेत. विशेष म्हणजे यामधील १० हजार गणवेश यापूर्वीच बंडखोरांपर्यंत पोहचले होते.

बंडखोरांच्या वाढत्या कारवाया रोखण्यासाठी सतत प्रयत्नशील असलेल्या बांगलादेशच्या सुरक्षा दलांनी ही कारवाई केली आहे. केएनएफ हा बांगलादेशच्या चितगाव पर्वतीय भागात सक्रिय असलेला एक बंडखोर गट आहे, तो कुकी-चिन समुदायासाठी स्वतंत्र राज्याची मागणी करत आहे. या गटाच्या कारवाया केवळ बांगलादेशातच नव्हे तर भारतातील ईशान्येकडील राज्ये, मिझोराम आणि मणिपूरमध्येही दिसून आल्या आहेत.

दरम्यान, बंडखोर या ३० हजार गणवेशांचा वापर करून भारत, म्यानमार, आणि बांगलादेशात एकाच वेळी त्रिकोणीय युद्ध छेडण्याचे कारस्थान रचत होते. भारताच्या मणिपूर, मिझोराम आणि म्यानमारच्या चिन राज्यात, राखेन स्टेट तसेच बांगलादेशच्या चटगाव हिलला ते लक्ष्य करणार होते. बांगलादेशातील सुरक्षा यंत्रणांच्या गुप्तचर अहवालानुसार, या गटाकडे तीन हजार प्रशिक्षित बंडखोर आहेत. त्यापैकी हजाराहून अधिक जणांना नुकतेच प्रशिक्षण देण्यात आले आहे.

केएनएफच्या कारवायांबाबत भारतातही सतर्कता आहे. कारण त्यांच्या कारवाया सीमावर्ती भागात अस्थिरता निर्माण करू शकतात. २०२४ च्या मणिपूरमधील रॉकेट हल्ल्यांमध्ये या संघटनेचा सहभाग असल्याची शक्यता आहे.